Emilía Nótt Davíðsdóttir er okkar fulltrúi á HM U20 sem fer fram í Ismailia í Egyptalandi 
Emilía keppir þriðjudaginn 5. maí í -69 kg flokki í B hóp. Í hennar flokki eru samtals 20 keppendur.
Keppni í B hóp hefst kl. 08:00 á 
tíma og verður í beinu streymi á Facebook síðu IWF facebook.com/iwfnet.
Áfram Emilía og áfram Ísland!
Erla Ágústsdóttir, +86 kg, sýndi glæsilega takta á stóra sviðinu í Batumi þegar hún keppti í B hóp. Mikill og góður gangur hefur verið á æfingum undanfarið og því mætti Erla með mikið sjálfstraust og áræðni. Frammistaðan endurspeglaði greinilega framfarir síðustu vikna.
Erla opnaði snörun á 103 kg sem fóru ekki upp og einhver hrollur gerði vart um sig. Hún sýndi mikinn styrk og reif upp sömu þyngd auðveldlega í næstu lyftu og reyndi svo við 106 kg sem voru nálægt því að fara alla leið. Í jafnhendingu náðí hún fullu setti þar sem hún byrjaði á 120 kg, fór næst í 124 kg, sem fóru upp og endaði svo á því að lyfta glæsilega 127 kg og þar með bæta sinn besta árangur samanlagt um 2 kg.
Samtals því 103/127 = 230 kg og 13. sæti niðurstaðan.
@craftverslun
@frumherji_hf
@gatoradeiceland
@sbdapparel
#LyftingasambandÍslands#oly#Batumi
Þórbergur Ernir Hlynsson, -110 kg, steig á svið í Batumi í morgun í C hóp. Æfingar hafa gengið vel undanfarið og því var hann vel undirbúinn og klár í slaginn. Hann opnaði á 144 kg í snörun sem fór upp. Næst reyndi hann svo við 3 kg bætingu á sínu besta en missti stöngina í botnstöðu. Hann mætti ákveðinn í þriðju lyftu, 150 kg sem fóru því miður ekki upp. Eftir góða hvíld opnaði hann í 173 kg í jafnhendingu sem fóru auðveldlega upp. Hann fylgdi því eftir með virkilega góðum 179 kg, 1 kg frá sínum besta árangri. Þriðja og seinasta lyftan var svo tilraun til Íslandsmets en upp vildu ekki 183 kg. Samanlagt lyfti hann því 323 kg, sem er 2 kg frá hans besta árangri. Niðurstaðan 2. sæti af 8 keppendum í C hóp.
Þórbergur er á góðu skriði og þessi frammistaða sýnir góðan stöðugleika og spennandi tíma framundan. Þegar þetta er skrifað þá er hann sem stendur í 11. sæti af 29 keppendum þegar tíu eiga eftir að lyfta í A hóp. Hann mun því neðst geta endað í 21. sæti.
@craftverslun
@frumherji_hf
@gatoradeiceland
@sbdapparel
#LyftingasambandÍslands #oly #weightlifting #batumi
Guðný Björk Stefánsdóttir, -69 kg keppti í dag í A hóp í frábærum aðstæðum í Batumi. Guðný mætti vel stemmd og greinilegt að mikill stígandi hefur verið í æfingum hjá henni undanfarnar vikur. Hún opnaði í 94 kg í snörun sem fór auðveldlega upp og setti nýtt Íslandsmet í -69 kg flokknum. Næst reif hún upp 97 kg af miklum krafti og bætti eigið Íslandsmet um 3 kg. Hún reyndi svo við 100 kg í þriðju og seinustu lyftunni, sem hefði verið 2 kg meira en hennar besti árangur, þá í -77 kg flokknum. Þyngdin fór upp en því miður tókst henni ekki að standa upp úr botnstöðunni og í kjölfarið lenti stöngin harkalega á herðunum. Sem betur fer fór ekki illa og gat hún haldið keppni áfram.
Eftir hvíldina mætti Guðný ákveðin á pallinn og opnaði jafnhendingu í 115 kg sem fóru ekki upp. Hún lét það ekki á sig fá og kláraði 116 kg af krafti og setti nýtt Íslandsmet. Lokatilraun til 122 kg og bætingar um 1 kg á sínum besta árangri samanlagt var ótrúleg barátta en Guðnýju tókst því miður ekki að halda stönginni í jafnvægi í efstu stöðu og því endaði hún á að lyfta 213 kg samanlagt, sem er nýtt Íslandsmet í -69 kg flokknum.
Þrátt fyrir krefjandi keppni og töluvert mótlæti, þá kláraði Guðný sína keppni af krafti og setti um leið þrjú ný Íslandsmet í -69 kg flokknum.
Niðurstaðan því 97 kg í snörun og 116 kg í jafnhendingu, samtals 213 kg og 14. sæti af 34 keppendum.
@craftverslun
@frumherji_hf
@gatoradeiceland
@sbdapparel
#LyftingasambandÍslands #oly #weightlifting #batumi
Katla Björk Ketilsdóttir, -63 kg, steig fyrst Íslendinga á svið á Evrópumeistaramótinu í Batumi, Georgíu í morgun.
Katla opnaði á 86 kg í snörun sem fór létt upp. Næst lyfti hún 89 kg sem fór einnig upp og þar með hafði hún bætt sinn besta árangur í snörun um 1 kg. Hún rétt missti svo 91 kg í lokalyftunni sinni. Í jafnhendingunni byrjaði hún örugglega með því að lyfta 102 kg og ætlaði svo að fylgja því eftir með 106 kg sem fóru ekki upp. Hún mætti ákveðin í þriðju lyftu og með mikilli baráttu tókst henni að ná 106 kg upp og með því hélt hún áfram að bæta sinn besta árangur, aftur um 1 kg.
Samanlagt lyfti hún 195 kg, sem er bæting um 2 kg. Virkilega vel gert Katla!
Árangurinn skilaði henni þriðja sæti í B hóp og sem stendur 15. sæti af 28 keppendum þegar A hópur á eftir að lyfta.
@craftverslun
@frumherji_hf
@gatoradeiceland
@sbdapparel
#LyftingasambandÍslands #oly #weightlifting #batumi
17. apríl, Batumi, Georgía.
Ársþing evrópska lyftingasambandsins (EWF) fór fram í Batumi, Georgíu. Fulltrúar fjölmargra þjóða mættu á þingið. Fyrir utan almenn þingstörf má nefna framsetningu ársskýrslna, opnunarræðu forseta georgíska lyftingasambandsins, Lasha Talakhadze og kosningar í nefndir.
Það er mikilvægt fyrir okkur að taka þátt og viðhalda sterkum alþjóðlegum samskiptum, efla tengingar og opna á umræður sem munu án efa efla starfsemi lyftinga á Íslandi.
Lyftingasamband Íslands (LSÍ) og Frumherji hf. hafa undirritað samstarfssamning til tveggja ára. Með samningnum gerist Frumherji einn af aðalsamstarfsaðilum sambandsins og styður þannig beint við bakið á öflugu starfi og framúrskarandi afreksfólki í ólympískum lyftingum.
Sem hluti af samstarfinu mun vörumerki Frumherja prýða allan æfinga- og keppnisfatnað sambandsins. Það er því ljóst að merki þessa öfluga fyrirtækis mun fylgja íþróttafólkinu okkar á keppnisgólfin, jafnt innanlands sem utan, næstu tvö árin.
Það er LSÍ mikið gleðiefni að fá jafn rótgróið og öflugt fyrirtæki og Frumherja í hóp bakhjarla. Nafnið „Frumherji“ á sérstaklega vel við í þessu samstarfi, þar sem íslenskt lyftingafólk hefur svo sannarlega verið brautryðjendur á sínu sviði á undanförnum árum. Með miklum dugnaði og elju hefur íþróttafólkið okkar náð eftirtektarverðum árangri á alþjóðavísu og rutt brautina fyrir komandi kynslóðir.
„Við erum afar stolt af því að fá Frumherja til liðs við okkur. Að sjá vörumerki þeirra á fatnaði okkar er tákn um sterkt bakland sem hjálpar okkur að vaxa enn frekar,“ segir Arnór Ásgeirsson, framkvæmdastjóri LSÍ.
Samstarfið mun renna styrkari stoðum undir rekstur sambandsins og undirbúning keppenda fyrir stórmót næstu tveggja ára.
Gatorade nýr bakhjarl Lyftingasambands Íslands.
Ölgerðin og Lyftingasamband Íslands (LSÍ) hafa undirritað viðamikinn samstarfssamning sem gildir til ársins 2028. Með samningnum verður vörumerkið Gatorade í forgrunni og Ölgerðin einn af aðalstyrktaraðilum sambandsins á komandi árum.
Samstarfið er mikið fagnaðarefni fyrir lyftingafólk, en Ölgerðin mun tryggja að landsliðsfólk Íslands í ólympískum lyftingum hafi aðgang að nauðsynlegum steinefnum og söltum til að hámarka endurheimt og árangur í kringum erfiðar æfingar og stórmót. Auk þess mun Ölgerðin styrkja veitingasölu á viðburðum og mótum sem og að merki Gatorade mun prýða fatnað sambandsins.
„Þetta er gríðarlega mikilvægt skref fyrir Lyftingasambandið. Að fá jafn sterkt vörumerki og Gatorade inn sem aðalstyrktaraðila styrkir grunninn undir starfsemi okkar og hjálpar okkar fremsta íþróttafólki að ná enn lengra,“ segir Arnór Ásgeirsson, framkvæmdastjóri LSÍ.
Á meðfylgjandi mynd við undirritunina eru fulltrúar Ölgerðarinnar og LSÍ: Guðný Björk Stefánsdóttir landsliðskeppandi, Valdís María Einarsdóttir f.h. Ölgerðarinnar, Arnór Ásgeirsson f.h. LSÍ og Rökkvi Hrafn Guðnason landsliðskeppandi.
Ársþing Lyftingasambands Íslands (LSÍ), hið 53. í röðinni, var haldið 25. mars 2026 í húsakynnum ÍSÍ við Engjaveg. Þingið fór fram samkvæmt lögum sambandsins og sátu það fulltrúar fimm aðildarfélaga.
Formaður LSÍ, Harpa Þorláksdóttir, setti þingið og fór yfir viðburðaríkt starfsár þar sem fram komu helstu verkefni, árangur og þróun í starfi sambandsins. Ársskýrsla stjórnar fyrir árið 2025 var samþykkt samhljóða.
Á þinginu voru ársreikningar sambandsins kynntir og samþykktir, en rekstur ársins 2025 skilaði hagnaði upp á um 3,8 milljónir króna. Þá var einnig lögð fram og samþykkt fjárhagsáætlun fyrir árið 2026.
Forseti ÍSÍ, Willum Þór Þórsson, ávarpaði þingið og fjallaði um stöðu og framtíðarsýn íþróttahreyfingarinnar. Við það tækifæri var Ingi Gunnar Ólafsson sæmdur gullmerki ÍSÍ og Hrund Scheving silfurmerki ÍSÍ fyrir framlag sitt til ólympískra lyftinga á Íslandi.
Engar nýjar tillögur bárust til þingsins, en lagabreytingar sem kynntar höfðu verið fyrirfram voru samþykktar samhljóða.
Kosningar fóru fram á þinginu, en þar sem ekki bárust fleiri framboð voru allir frambjóðendur sjálfkjörnir í stjórn og önnur trúnaðarstörf. Harpa Þorláksdóttir heldur áfram sem formaður sambandsins og situr áfram á gildandi kjörtímabili.
Í lok þings voru þrír einstaklingar heiðraðir með útnefningu sem heiðursfélagar LSÍ fyrir framlag sitt til íþróttarinnar: 10. Óskar Sigurpálsson, 11. Ásgeir Bjarnason og 12. Eygló Fanndal Sturludóttir.
Að því loknu sleit þingforseti, Hafsteinn Pálsson, þinginu.
Smáþjóðamótið í ólympískum lyftingum haldið í Miðgarði í Garðabæ, laugardaginn 14. mars.
Heildarúrslit má nálgast hér og í gagnagrunni sambandsins hér
Liðakeppni – úrslit
Karlar – úrslit
Konur – úrslit
Smáþjóðamótið í ólympískum lyftingum (European Small Nations Tournament) fór fram við frábærar aðstæður í húsakynnum lyftingadeildar Stjörnunnar í Miðgarði í Garðabæ á dögunum. Mótið heppnaðist afar vel og var bæði keppendum og gestum til mikillar ánægju.
Alls tóku 29 keppendur frá sjö löndum þátt í mótinu. Auk Íslands mættu til leiks lið frá Færeyjum, Mónakó, Lúxemborg, San Marínó, Kýpur og Möltu. Keppnin var spennandi og sýndu keppendur frá þessum smærri þjóðum Evrópu mikla færni, styrk og íþróttamennsku.
Aðstaðan í Miðgarði reyndist afar vel til mótahalds og skapaði góðan ramma utan um keppnina. Sjálfboðaliðar LSÍ og lyftingadeildar Stjörnunnar lögðu mikið á sig við undirbúning og framkvæmd mótsins og áttu stóran þátt í því hversu vel tókst til.
Slík mót gegna mikilvægu hlutverki í að efla tengsl milli smærri lyftingaþjóða Evrópu og gefa íþróttafólki tækifæri til að etja kappi við jafnoka sína á alþjóðlegum vettvangi.
Að lokum vill Lyftingasamband Íslands færa öllum samstarfsaðilum mótsins kærar þakkir fyrir stuðninginn. Sérstakar þakkir fá aðalsamstarfsaðilar LSÍ, Craft og Gatorade. Einnig eru Garðabæ, lyftingadeild Stjörnunnar, SBD, Hertz, Lux veitingar, Hótel Vellir, Katla Fitness, Sonik, BerndsenPhoto og Velmerkt þökkuð fyrir gott samstarf og mikilvægan stuðning við framkvæmd mótsins. LSÍ vill einnig færa Evrópska lyftingasambandinu, dómurum og öllum þátttökuþjóðum kærar þakkir fyrir ánægjulega samveru sem styrkir enn frekar tengsl og samstarf þjóðanna.
Smáþjóðamótið í Garðabæ staðfesti enn og aftur þann metnað og fagmennsku sem einkennir öflugt samfélag ólympískra lyftinga.
Ljósmyndir: Baldvin Berndsen
Lyftingasamband Íslands 